中環出更：陳浩寧出嫁收五卡巨鑽
社交界喜事多籮籮，大家樂太子女陳浩寧（Candice）宣布同拍拖七年嘅男友趙益坤（Leonard）訂婚。Leonard靜雞雞策劃求婚派對，更出動五卡巨鑽，令伊人感動落淚。
Candice日前同男友十指緊扣出席Hong Kong Tatler周年舞會，公布明年五月做新娘。男友來頭不小，家族開設地產公司，同女家可謂門當戶對。
Leonard大爆浪漫求婚經過，話說今年六月，佢包下酒店場地搞晚宴，說是替友人搞活動，Candice到埗一睇，原來男友喺全場掛滿兩人拍拖多年嘅溫馨照，作為女方，唔冧就奇。Leonard仲當眾攞出一枚家傳之寶鑽戒，即席跪地求婚，Candice興奮落淚，答應下嫁，認真Sweet。
李桂蘭噴出古銅色
不過兩人一直將訂婚消息保密，前民政事務局常秘李麗娟細妹李桂蘭（Olivia）就話，一早收到風，事關佢同一對準新人嘅雙方家長係世交。Tatler Ball上，Olivia與任職英國投資銀行嘅三仔戴尚文齊來，佢一襲金黃色斜肩裙，艷壓全場。Olivia話，近年愛上喺網上買衫，身上嗰件，只需六百美元，設計絕不遜於國際名牌。為塑造完美效果，佢專登去美容院噴得一身古銅色，靚絕。
卓妮