大嶼山逾千人跨海上學

儼如參加三項鐵人賽

上學儼如參加三項鐵人賽的黃同學，家住梅窩，今年升中一，清晨五時她便要起床梳洗，未夠六時要出門，踩十分鐘單車趕到碼頭，乘搭渡輪到中環。到中環又要乘巴士到銅鑼灣，落車後再步行十分鐘回校。

由踏出寓所至返到校園，需時約兩小時，黃同學直言非常疲倦，又經常擔心「唔知醒」：「每晚要檢查幾次鬧鐘先敢瞓，試過唔知醒，六點先起身，嚇到即刻趕去碼頭！」為減輕女兒的壓力，黃媽媽決定於本月下旬與女兒搬到港島區租住唐樓，丈夫則留在梅窩，一家人要周末才能團聚。

同樣居於梅窩的曾同學，對跨海返學也感到身心疲累：「有時放學回家，攰到好眼瞓，真係唔想返學。因為趕船，不能參加課外活動，有時仲要在船上做功課！」

今年升中六的杜同學，雖然獲分派到西大嶼山的大澳升學，不用跨海上學，但過程亦不好受，他每日需要坐四十五分鐘巴士，經過崎嶇山路返校，「初初一坐車就嘔，有時未上車已經嘔定先，真係見到車都驚！去到車站手都痹晒，我睇過醫生，佢話係心理壓力！」

人數達最低要求應開辦

教育界立法會議員張文光對學生跨區苦學，亦感到心痛，他認為當局應特事特辦，「南大嶼山學生長途返學，實在太辛苦，如果每年入讀嘅學生人數達到最低要求，教育局應該開間中學畀佢哋！」

南大嶼教育關注組召集人馬雪芬直言，自○七年新界鄉議局南約中學被殺校後，當局始終不肯面對該區學生的需求，計算中學學額的方法不全面：「教育局只係計升中派位，無計其他年級學生。南大嶼區一個學額都無，我哋啲學生跨區去晒全港，梗係無學額不足啦！」

專案組