黑箱作業揀處長　公開招聘得個樣

港府尋日公布委任勞工及福利局副秘書長鄧忍光空降港台，出任廣播處處長，月中履新。消息一出，各界嘩然，梗係啦，前處長黃華麒任滿唔撈，港府去年底煞有介事展開全球招聘，點知大鑼大鼓搞咗大半年，最後又係搵番政務官執掌港台，你話係咪除褲放屁多此一舉吖！唉，呢場招聘騷做得真難睇！

政務官首度空降出任廣播處長，港台上下隨即鬼殺咁嘈，又話港府捨近求遠，以外行人管內行人；又話咁形同政治任命，擔心新任處長對當局唯命是從，忘記公共廣播理念；又話會影響港台嘅所謂編輯自主，等等。

嗱，港台中人咁大反應，絕對可以理解㗎。你知啦，港台一貫用編輯自主作擋箭牌，當正自己係無王管嘅獨立王國，閂埋門為所欲為，咁多年嚟醜聞不斷，大花筒、穿櫃桶底、管理混亂等等，無奇不有。依家港府空降政務官實，佢哋唔反枱就有鬼咯！

講開又講，港台確係需要整頓，呢一點毋庸置疑，之但係廣播處長以公帑聘用，加上職位敏感，遴選過程一定要均均真真，唔可以求求其其㗎，好可惜，港府兩樣都犯勻晒。

第一，空降政務官本來無可厚非，之但係遴選過程黑箱作業，咁就好大問題。港府明明以公開招聘形式揀人㗎嘛，點解失驚無神走個政務官出嚟呢？港府解釋搵唔到合適人選喎，咁就奇嘞，唔通公務員真係叻過晒全港市民？定係港府有其他不可告人嘅政治考慮呀？

嗱嗱嗱，如果港府真係另有苦衷，就必須公諸於世，唔好收收埋埋呀，否則，好似前廣播處長朱培慶偷食被撞破，一味閃閃縮縮，匿喺艷女屁股後面令醜聞愈遮愈臭，咁就羞家咯。

第二，就算撇除遴選過程黑箱作業唔講，新任處長係咪合適人選，亦實在好令人質疑。翻開鄧忍光嘅履歷，關於公共廣播嘅經驗完全係白紙一張，試問如何駕馭港台呢個獨立王國？冇錯，鄧生喺勞福局專責兒童及殘疾人士福利政策，而港台入面的確充斥無數霸王小學雞同腦殘管理層，但呢個絕對唔係委任佢嘅合理理由喎。

嗱，唔好話功夫茶唔提醒，新廣播處長第日被人玩到陀陀擰事小，港台繼續陰陽怪氣污染大氣電波事大呀！