政情：黃友嘉挺唐不為官職？
特首選戰開始白熱化，疑似特首候選人各自出招造勢，各人嘅支持者亦紛紛出動撐場。好似廠商會會長黃友嘉尋日就首度開腔指有廠商背景嘅政務司司長唐英年（唐唐）係好適合嘅特首人選，而且讚到對方「天上有地下無」，因而令人聯想佢有機會加入下屆政府出任局長。
不過，挺唐挺到出晒面嘅黃友嘉強調，至今未有人邀請佢埋班，又指自己唔會毛遂自薦出任局長，重申對此隨遇而安喎。但眾所周知，黃友嘉鍾意做政策研究，亦對於經濟發展有個人見解，究竟佢今年底卸任廠商會會長後情歸何處，大家拭目以待喇！
另外，據聞廠商會喺十月底會舉行換屆選舉，當中以副會長施榮懷成為會長大熱門。至於副會長方面，有傳將會出現差額選舉，因為本身係常務會董、有意參選立法會飲食界挑戰自由黨張宇人嘅黃家和，都有興趣做副會長，睇怕會有一番激烈競爭。