政情：李泳漢玩區選家人愕然
前港姐楊思琦早前嘅移情別戀事件引來全城熱話，畀佢狠撇嘅前度男友李泳豪得到家人支持，而李泳豪嘅孖生大哥李泳漢（Augustine）亦因此曝光率大增。Augustine本身都係演藝界一分子，原來佢平時都好留意時事，近日仲決定拍住人民力量參選十一月嘅區議會選舉添。
Augustine尋日解釋，自己以前喺大學讀書都係修讀政治學，所以並唔係突然間對政治有興趣，之前一直冇行出嚟參加政治活動，全因為想集中精力去發展事業，今次如果唔係有啲立法會議員發表極度反智嘅「懲罰選民論」，佢都唔會下定決心參選。
失驚無神話選區議會，當事人都直言家人起初好愕然，仲表現得唔係好支持，但見到個仔咁有決心，最終都畀Augustine感動到。Augustine正積極考慮喺九龍城區議會黃埔西選區出選，挑戰現任西九新動力議員，雖然起步遲咗啲，但相信選民會見到佢都係真心為香港好，得票唔會太難睇喎。