政情：鼠王芬索百億公帑治水
外號「鼠王芬」嘅專業會議立法會議員梁美芬，早前走咗去維港抽水驗水質，因而變成「抽水芬」，為咗隆重其事，尋日佢宣布成立「碧海行動」，專門監察維港水質。其實夕陽政府早年都有個「藍天行動」，結果如何，大家心知肚明，抽水芬依家東施效顰，唔知成效會如何呢？
早前抽水芬已經去過大角咀同土瓜灣抽水去檢驗，結果發現水質極差。鑑於渡海泳舉辦在即，碧海行動就喺上個月底，走勻維港兩岸八個地點抽水檢驗，結果發現一半地點嘅水質「欠佳」、另一半「尚可」。行動召集人何建宗話，雖然水質屬可接受水平，但都唔係太適宜游水喎。
話時話，除咗碧海行動外，抽水芬仲擔任西九新動力主席同環保促進會主席，今次再度另樹旗幟，佢解釋話本港唯一嘅維港好重要，所以要設立呢檔嘢，佢仲要求夕陽政府撥一百億元，搞番好維港嘅水質。抽水芬嚟緊要專心治水，唔知喺九龍西橫行嘅鼠輩會否鬆一口氣呢？