政情：白鴿黨難入場選特首
特首選戰已經進入最後大直路，各路疑似特首候選人都已進入作戰狀態，泛民主派固然想分一杯羹，白鴿黨更加流晒口水。不過，今屆特首選舉已提高門檻，參選人必須湊夠一百五十個選委提名，唔同上屆咁話選就選。據聞泛民對參選唔係太樂觀，事關佢哋目前只係搵到一百二十人出戰選委會，就算贏晒都仲欠三十個提名，連入場券都攞唔到，真係不自量力。
代表白鴿黨搞選委戰嘅李永達（高達），近排已經不停呼籲唔同專業界別人士參選，但成績唔係好理想，只有約一百二十人答應出選，好似社福界、高教界及法律界等都有人肯捱義氣。不過，有啲「重災區」界別就好難搵到人去選，例如醫學界同建築、測量及都市規劃界，反應就非常冷淡，後者到依家更只得一個人肯參選，唔知係咪大家都想杯葛特首小圈子選舉呢？
高達隨時要引咎辭職
高達就估計，啲人咁冷淡全因為佢哋覺得泛民候選人無可能贏到今次特首選舉，所以唔少人都因此而卻步。雖然白鴿黨好想靠特首選舉戰翻身，但如果搵唔夠提名，白鴿黨派邊個參選都無用，況且泛民派邊個出選都仲要經過內部初選。據聞白鴿黨主席何俊仁（鐵頭仁）已經落咗柯打，無論如何都要搵到二百人參加選委戰，咁先至有信心攞到足夠提名，又話如果搵唔到，就要高達引咎辭職喎。
正當白鴿黨苦惱緊選委戰之際，原來佢哋喺區議會戰場已經火燒後欄，可以話係腹背受敵。人民力量黃毓民話，將派出六十一人參選，差唔多有一半人係挑戰「偽民主派」，例如陳偉業就會去屯門向鐵頭仁挑戰，矛頭直指白鴿黨。毓民多次強調，人民力量今次參選不計議席，目標志在擊敗對方幾個大佬級人馬，睇嚟白鴿黨今次唔死都一身潺。
人民力量喺嚟緊區選有幾個特別口號，而且句句到肉，好似針對九龍西梁美芬就高叫「九龍城滅鼠」，攻擊民協老巢就用「深水埗拔筍（筍為民協標誌）」，至於狙擊白鴿黨就當然係「燒鴿行動」啦！睇嚟今屆區選真係相當有趣。