既然警隊一哥禿鷹先生將記者形容為黑影，照咁講財政司司長曾俊華都係一團疑似黑影，事關佢老哥似乎幾鍾意學記者一樣爆料。當然啦，若然「黑影司長」攞出一部攝影機，神秘黑衣人應該唔會基於本能反應出手擋格，更加唔會匪夷所思到卡住隻手。
呢嗱，功夫茶呢一個「黑影論」唔係講笑㗎，鬍鬚曾煞有介事撰寫網誌，披露一則獨家消息，十分之具備記者本色。佢實牙實齒咁話喎，內地公司比亞迪股份有限公司正同九巴公司商議，會將一部K9型電動單層巴士出租畀九巴試行六個月，連路線圖都有埋，首先會行走尖沙咀至葵芳。
你知啦，電動車輛係環保救星，不排放懸浮粒子以及溫室氣體吖嘛，如果九巴公司真係租用電動巴士測試，算得上係一件功德㗎。可能因為曾俊華身兼「推動使用電動車輛督導委員會」主席啩，所以佢急不及待公布呢一項環保佳音。
之但係問題出現嘞，鬍鬚曾到底是否一個稱職嘅爆料記者？答案係否定嘅。九巴其後急急腳澄清，有關計劃實情係該公司出資與比亞迪共同研發右軚版電動車，並非租車。九巴又話，電動巴士將來的確會喺香港測試，之但係到港日期同行走路線都言之尚早。
你話係咪弊傢伙吖？堂堂一個司長居然亂噏廿四，爆料爆到一塌糊塗，連人哋係出資研發定係租車測試都未搞清楚，自己瘀到爆都仲係小事，隨時禍港殃民先至大劑。喂，身為大掌櫃嘅財爺萬一糊糊塗塗計錯數，搞到經濟崩潰點算好？
唉，講開又講，家陣嘅曾氏四人幫確係令人不敢恭維。一個曾蔭權民望插水，一個曾偉雄人人喊打，一個曾德成一事無成，再加埋呢一個學做黑影亂爆料嘅曾俊華，撞板多過食飯。
不妨套用另一位司長唐英年嘅金句，曾俊華誤導群眾嘅獨家消息完全係垃圾，英文講法係Completely Rubbish。唔好誤會功夫茶侮辱曾司長呀，仍然套用唐司長邏輯，功夫茶形容曾氏獨家消息係垃圾，只不過係完全尊重佢嘅言論自由！
講到呢度，功夫茶開始唔知自己講乜，畢竟曾氏四人幫再加上一個唐氏綜合症病患者，真係會搞到全人類暈陀陀㗎。不如咁啦，講番電動巴士，功夫茶想請教曾司長，理論上電動車輛的確環保，之但係發電廠又點呢？如果發電廠繼續排放大量廢氣，即使全世界改用電動車輛都於事無補喎。麻煩曾司長好好研究一下，未研究好之前，唔好再亂噏廿四！