前保安局局長葉劉淑儀一手創立新民黨，銳意喺未來幾場選舉大展拳腳，最近該黨「三軍未動就糧草先行」，率先擴充營業搬竇，展示該黨雄厚嘅資本實力，該黨秘書處由原本位於灣仔嘅中國海外大廈五樓B-C室，搬高啲到同一大廈嘅十一樓D-F室，與同樣由葉太成立嘅匯賢智庫成為鄰居。
有新民黨中人話，今次搬高啲嘅主要原因係新民黨唔夠地方用，加上該黨同匯賢智庫本身關係密不可分，所以先會決定整合資源後，喺毗鄰租多一個半個單位方便日後工作。至於騰空出來嘅五樓兩個單位，據聞該黨有意繼續租用，並初步計劃作為明年選舉辦公室之用。
話時話，中國海外大廈可能喺灣仔港鐵站附近夠就腳，漸漸成為咗一座政治大廈，除咗新民黨佔咗四個單位，工聯會政務委員會辦事處都喺呢度。咦，工聯會喺十二樓喎，新民黨搬高啲，都仍然畀工聯會騎住添。