政情：街坊想娶梁嘉銘做新抱
新界青年聯會副主席梁嘉銘係政壇新秀其中一個靚女，佢喺○七年首次參加葵青區議會興芳選舉，以五百多票之差落敗，佢今年積極考慮捲土重來，同當區嘅民主黨吳劍昇再較高下，原來梁嘉銘嘅工作甚得街坊歡心，有街坊仲鍾意到直情想娶佢做新抱添。
話說梁嘉銘有次落區見市民，有街坊見梁嘉銘幾靚女，八卦問吓佢結咗婚未，當知道梁嘉銘名花有主而且結埋婚時，該街坊即時慨嘆自己個仔或者孫仔無機會，但收拾心情後竟向梁嘉銘嘅仔女埋手，講明第日梁嘉銘生嘅BB要畀佢湊，簡直就諗住當梁嘉銘嘅仔女係自己個孫，成班街坊對梁嘉銘有幾鍾愛真係顯而易見。