政情：李漢奸民主阿婆密斟新搞作
「搞事四人幫」成員，民主阿婆前政務司司長陳方安生、白鴿黨創黨主席李柱銘即係李漢奸同肥佬黎等人，成日聚頭對香港政壇指指點點，尋日下午兩點十五分左右，民主阿婆同李漢奸又被撞破喺香港會食飯，兩人同一名外籍神父喺度等車接送離開，其中李漢奸送咗該名神父上車後先離開，總之民主阿婆同李漢奸密斟，一定冇乜好嘢。
據聞，泛民主派開始就參選特首問題交換意見，民主阿婆早前曾大力游說公民黨中人代表泛民主派參選，而非白鴿黨屬意嘅黨主席何俊仁，但由於白鴿黨堅拒為公民黨抬轎，有關建議先胎死腹中。民主阿婆尋日同李漢奸密會，今次又唔知想搞乜嘢嘞。
維基解密爆陳太批《蘋果》
講開民主阿婆，頻頻爆料嘅「維基解密」其中一份文件中透露，民主阿婆曾經向美國駐港總領事話，香港傳媒中缺乏一份真正獨立嘅中文報章，佢又特別提到連睇起上嚟較民主嘅《蘋果日報》，都有其政治包袱。佢看似好體諒佢老友肥佬黎嘅報紙，其實咪就係批評佢做得唔好囉。