政情：肥佬黎密會志雲由側門走人
尋日唔知係咩日子，飯局特別多。無官司一身輕嘅無綫電視業務總經理陳志雲尋日首日返工，夜晚放工後立即同肥佬黎食晚飯，畀記者撞破，飯後肥佬黎喺酒店門口等司機嚟接佢時，多次打電話催促司機嚟接佢，仲話：「你咁耐㗎，仲未到？門口好多記者呀！」撐枱腳都畀人撞破好事，真係戥佢尷尬。
陳志雲晚上約七點搭七人車到達尖沙咀半島酒店，在場記者原先唔知佢同邊個食飯，至晚上約九時十五分，竟然見到佢同肥佬黎一齊由酒店側門步出。食飯係光明正大嘅事，但唔知點解兩個人都唔係好想答記者問題，好似問到二人係咪有合作時，兩人都冇回答，再追問二人是否惺惺相惜，佢哋就淨係識以笑遮醜，呢個時候，肥佬黎等得好唔耐煩，不斷打電話催促司機嚟接佢。後來肥佬黎仲送陳志雲返屋企添。
陳志雲官司啱啱完，又同肥佬黎密會，真係可以引起好多聯想。