政情：建制派變相雪藏林D9
超弱勢嘅夕陽政府做咩都有心無力，最近政制及內地事務局局長林瑞麟（林D9）主理嘅替補機制諮詢搞到一鑊泡，激發多個激進團體衝入諮詢會場示威抗議，更加令人對與民為敵嘅政府徹底失望，據聞建制派為求自保，成功爭取港府將取消區議會委任制呢個惹火嘅議題，拖延至十一月區選後先公布，變相雪藏林D9起碼兩個幾月先畀佢重見天日，林D9做高官做到畀人雪藏，真係笑死人。
夕陽政府對處理取消委任制一直採取拖字訣，之前林D9話做好二○一二年行政長官同立法會條例嘅立法工作後，先處理呢個問題，而到六月中時，港府又有對外吹風會公布細節內容，但及至林D9喺立法會休會前回應議員口頭質詢時，又「變臉」實牙實齒話喺區選前就此提出建議。
據聞港府原先有意喺十月公布取消委任制嘅細節，但無論決定分兩階段或三階段，都勢必會觸發新一輪政治風波，形同向泛民主派送上彈藥炒熱區選，建制派對此強烈反彈，並即時同港府討價還價。
替補機制 前車可鑑
老實講，建制派嘅擔心並非冇道理，因為林D9最近處理親咩議題都激起民怨，好似替補惡法激發二十二萬人七一上街遊行，逢親力撐過替補機制嘅建制派中人都焦頭爛額，故建制派已明示暗示林D9將替補機制掃入地氈底。
建制派認為，替補機制唔提得，取消區議會委任議席都係一樣，港府評估後決定賣個順水人情畀建制派，但其實咁做都有風險，因為屆時勢必畀人話佢睇住建制派嘅區選結果「造數」，「河蟹」建制派同泛民主派勢力均等區會，而且即使屆時分兩個定三個階段取消委任制，亦都會觸及包括建制派既得利益者嘅權益，到時再次蒲頭嘅林D9勢再必成為各路人士嘅人民公敵。總之做高官做到要消失，呢位高官同呢個政府都係可悲可憐喇。