中環出更：蔡冠深膺嶺大榮譽博士
中華總商會會長蔡冠深向來支持教育事業，多年來捐贈逾三億港元推動教育，近日獲嶺大頒授榮譽社會科學博士學位。
李運強林李翹如同獲殊榮
蔡冠深尋日出席中總會員大會，講起獲頒博士銜，佢好幽默話，頒獎禮十月底先舉行，點解大家咁早知喎。蔡生話，過去雖然無直接捐錢畀該校，但一向支持嶺大學生往內地交流，好多謝對方表揚佢。蔡冠深為香港、故鄉中山、內地省市及海外地方培育人才，並設立多項嘅獎學金，資助貧苦子弟求學。佢又領導新華教育基金，為中國基礎教育研究融合東西方優點嘅教育模式。
同獲嶺大榮譽博士殊榮嘅，仲有「造紙大王」理文造紙主席李運強及前大學教育資助委員會主席林李翹如。李運強多年來喺內地學校捐錢超過一億元，三子李文斌今年曾捐贈二千七百萬元畀嶺大，李運強將獲頒榮譽工商管理學博士學位。