中環出更：麥瑞琼為外傭踎低揀鈎
「零售女王」麥瑞琼（Caroline）係商界不可多得嘅女強人，凡事愛親力親為。新屋入伙，一磚一瓦佢都親自挑選。卓妮上周五行經灣仔駱克道，嗰度建築材料同潔具店舖林立，撞見Caroline好投入咁逛潔具專門店，原來佢係買掛鈎畀屋企嘅家傭。
時值晏晝四點，Caroline獨自逛建材街。潔具店內掛鈎琳琅滿目，佢全神貫注揀鈎，仲踎低細心比較各款設計，最後扑錘買入一個雜物掛鈎。原來個鈎並非買畀自己，係買畀家中外傭至真。
相處十多年 情如好姊妹
Caroline爆料話，新屋正在裝修，除預留工人房，仲有一個工人廁所，個鈎就係買來放喺工人廁所用。Caroline話，佢同外傭相處十多年，情如好姊妹，搬屋都預足空間畀佢用，等佢住得Happy，做工做得開心。
咁邊款鈎先啱心水？Caroline就話，最緊要外形靚，夠實用，仲要經濟實惠，難怪佢唔想假手裝修師傅，自己出馬嘞，店內掛鈎唔算貴，百多二百元有交易，合乎實惠原則。
近排外傭極力爭取居港權，唔知身為零售管理協會主席嘅Caroline會唔會支持呢？講到敏感話題，佢話保持中立，如果法律容許合資格嘅外傭居港，唔會反對喎。
卓妮