深圳市第五屆人大常委會會議通過咗第四批深圳市榮譽市民名單，四十八位榮譽市民中有廿六個係香港人，佔今次人數嘅一半以上，認真威水。今次被授予榮譽市民嘅港人包括港區全國人大常委范徐麗泰、有「深圳王」之稱嘅東海聯合集團主席黃楚標、「玩具大王」蔡志明嘅大女婿馬鴻銘等。
今次一共有四十八人成為深圳榮譽市民，係歷來最多嘅一次，而港人就佔咗廿六個，另外十四個係外國人，仲首次有台灣人列入名單，有成八個咁多。獲授予名銜嘅港人之中，大家比較熟悉嘅就有范太。
今次獲得名銜嘅港人之中，唔少都係對深圳有投資發展貢獻嘅商人，好似黃楚標就累計捐贈咗八千萬人民幣，仲開咗中國動用私人飛機救災嘅先河，抵佢成為榮譽市民。做榮譽市民有乜着數？其中一項就係參加深圳重大慶典時，可以享受貴賓禮遇囉。