「黑影論」招惡搞
網民主要批評警方喺國務院副總理李克強訪港期間嘅保安安排，有網民轟姓曾嘅高官無恥，又有家長要求煲呔曾炒警務處處長曾偉雄︰「一個堂堂警務處長當眾畀假口供，搞到我唔知點教仔。」說話真係一矢中的。
曾偉雄喺立法會會議上又「黑影」、又「卡住」咁死不認錯，搞到市民好火滾之外，有網民更惡搞「黑影論」，話要教育下一代要用「黑影」同「卡住」做抗辯理由，皆因呢兩個詞語好使好用咁話︰「殺人係咪可以話見到黑影，可以自保；搶槍可以話係畀差佬個槍袋卡住隻手。」一段講開學嘅短片都搞成咁，煲呔曾不如先管好旗下班子，講開學嘅嘢盞誤人子弟。