政情：董耀中焗留任旅議會
香港旅遊業議會現任總幹事董耀中（阿董），原定喺年底就夠鐘退休，旅議會亦早已搵到合適接班人，但點知到臨簽約前撻Ｑ，最後決定搵番阿董做多兩年。由於政府正檢討旅遊業規管架構，好大機會會廢除或者大幅改革旅議會，令阿董有望成為旅議會嘅末代總幹事。
旅議會早前透過獵頭公司招聘新總幹事，據聞有多人應徵，但完全符合各項條件同要求嘅唔多。有關評選委員會經過多輪甄選，早前終於選定一名業內人士接棒，點知最近想同佢正式簽約，佢就臨時縮沙，原因不明，白白浪費高達四十萬元嘅招聘開支同心血。
旅議會曾經諗過重新進行招聘，但擔心又會畀人話嘥錢，加上旅遊業規管架構大改革在即，與其再花時間請過個新人，不如搵番舊人做，於是就游說已諗定退休大計嘅阿董「再坐一會」，阿董亦一口答應，續約兩年至二○一三年底。
有旅議會理事私下話其實對阿董一再續約有保留，只不過依家業界亂糟糟，旅議會選擇唔多，佢哋先至被迫支持。