政情：張建宗搞交津歎慢板
跨區交通津貼新計劃將喺十月一日展開，但政府仍然歎慢板，所有申請手續、批核時間等安排細節仍然未公布。一班勞工界立法會議員對呢件事非常上心兼好心，一早叮囑勞工及福利局局長張建宗，快啲畀張申請表格佢哋先過目，萬一有錯漏都可以即刻修改，避免出錯引起混亂。不過，暑假已經完結，但張建宗一啲聲氣都冇，激到班議員紮紮跳，話畀個良心佢當狗肺。
其實跨區交津計劃都算一波三折，由開初諮詢用咗成年時間，到真正出台後又兩度「跪低」，包括放寬入息限額及容許工時不足嘅人申請「半津貼」。不過，申請方式仍然由個人單位變成家庭單位，搞到當日表決時，長毛要喺立法會怒掟「膠樽（交津）」。事隔幾個月，新交津快將落實推行，唔同政治背景嘅勞工界議員聯成一線，希望政府私下提供多啲資料，可惜張建宗就闊佬懶理。
剛愎自用 雙輸局面
擔任立法會人力事務委員會副主席嘅勞聯李鳳英話，委員會主席李卓人都好緊張件事，記得阿人早前去美加前，已經同佢交帶聲，話政府可能有張申請表格畀佢哋睇睇先，但點知阿人去完美加返港成個星期，到依家都未有收到張表格。英姐好勞氣話，其實喺實施前睇睇張表格，都係想幫政府一眼，睇吓有冇甩漏，可以及時修改，但如果政府公布晒所有細節後，工人有好大意見嘅話，佢哋反對會令政府好冇面，但硬食又啃唔落，只會令政府、工人都造成雙輸局面。
英姐就舉例話，好似關愛基金派發六千元畀新移民嘅表格，佢話張「示範表格」上面，名稱個欄寫咗「陸仟圓」三隻字，政府以為咁好得意，但就搞到班新移民以為要改名換姓，以為填表時要填「陸仟圓」做自己個名，令英姐近排收到好多投訴。其實政府唔聽佢哋意見，已經唔係第一次，張建宗更衰過好多鑊，但至今依然未學精，唔識吸取教訓，唔怪得英姐咁火。