中環耳目：王嘉恩帶隊歎正宗咕嚕肉
博愛總理王嘉恩（Albert）稱得上係「咕嚕肉之王」，事關佢為訪尋一啖絕世好肉，幾乎吃遍全港。尋尋覓覓，佢都係覺得中環雲咸街南華大廈四樓間「五陵會」嘅菠蘿咕嚕肉最正宗、最正斗。有日佢就宴請老友「燕之家」老闆白富鴻同兩位契妹，包括菁英會副秘書長王文博及灣仔區議員伍婉婷一齊歎美食。
「五陵會」只限招呼會員，私隱度高，Albert話高談闊論無所顧忌，早已成為常客，而且每次食飯例必柯打「菠蘿咕嚕肉」。該會選用半肥瘦梅頭肉，上粉厚薄適中，炸至香酥，口感香脆嫩滑。原來Albert從小就食媽咪炮製嘅鬆脆咕嚕肉，因而愛上呢味菜式。佢又極力推介「大中蝦煎米粉」，以煎得香脆嘅米粉拌肥美大蝦上碟，色香味俱全。
北韓嘗鮮甜牛睾丸
講開美食，Albert好有冒險精神，曾喺內地交流時，迫不得已試食炸蠍子及蠶蛹，有次去北韓公幹，見人攞住一片片似波板糖嘅東西喺爐上燒烤，佢食咗幾片後感覺鮮甜美味，細問之下，原來係牛睾丸，佢笑言：「難怪咁好味。」卓妮問佢係咪好補身，Albert
笑話唔知：「我學功夫嘅，唔食補品，身體一樣勁！」