中環出更：郭炳湘戴Hublot名錶展朝氣
新鴻基地產非執董郭炳湘自退下火線後，生活態度愈見從容。早前卓妮喺一公開活動上，見到佢戴住一隻朱古力色橡膠錶帶設計嘅瑞士Hublot靚錶，充滿朝氣，令佢一向穩重嘅形象即時年輕唔少。郭大少笑稱，隻錶係喺拍賣行競投返來，佢鍾意隻錶夠晒運動型。
拍賣會競投扑錘
郭大少話，佢間中會去拍賣會睇吓靚嘢，早前見到隻錶就被深深吸引，事關顏色、設計同塑膠錶帶，搭配勁特別，所以就買嚟氹自己開心。講到興起，佢仲即時除隻錶畀卓妮睇真啲，態度好親民、和善。問佢使咗幾多錢競投？佢笑稱：「唔記得囉！」咁又係嘅，做人最緊要開心。
講開Hublot嘅Big Bang靚錶，係佢哋最受歡迎嘅經典錶款，大少嗰隻係四十一MM，鋼製錶圈由六粒H形螺絲鎖緊，加上朱古力色碳纖維錶面及橡膠錶帶，設計細節處處彰顯男性不拘小節嘅豪邁本色，難怪大少一見鍾情喇。