中環出更：項明生貴州送暖遇奇迹
善有善報，近年積極修善積福嘅Sony Computer Entertainment HK Ltd市場部總經理項明生（James），今日起正式升職為香港分公司董事，成為首位躋身董事會嘅華人，真係恭喜晒！James話今次升職好開心，佢入職公司十三年，證明畀足心機做嘢，梗有出頭一日。佢嘅奮鬥史確為時下青少年打下強心針。
SONY首位華人董事
點子多多嘅James除咗負責市場推廣，成功令公司產品人氣急升外，去年公司新設立「企業策略部」，負責公益慈善活動，都係由佢負責。鍾意遊山玩水嘅James於是更加努力去玩，然後瞓身寫書，收益全數捐畀慈善機構「小母牛」，令公司形象提升唔少，升做董事實至名歸。上星期佢又跟小母牛一眾捐贈者去貴州探訪，同行名人善長粒粒皆星，大家仲見證一場神迹添！
此行由國際小母牛香港分會主席梁錦松帶隊，佢太太伏明霞係小母牛愛心大使，梗要做「跟得夫人」啦。團員仲有小母牛董事葉澍堃（Stephen）夫婦、「快勞夾大王」杜振源、莎莎主席郭少明及機管局行政總裁許漢忠等。由於正值暑假期間，好多人都帶埋仔女一齊去，包括郭少明囝囝、阿松大女Amy、Stephen囝囝Ian等，團員多達四十幾人，要包兩架旅遊巴至搞得掂。
農戶久旱喜逢甘露
James話，此行最值得一提嘅係一場媲美神迹嘅及時雨，話說當地已連續六十日冇落雨，佢哋都親眼見到土地乾旱龜裂，村民望住枯死農作物欲哭無淚。點知有日突然落傾盆大雨，農民開心到跳舞，猛話係香港人嘅愛心感動個天，所以至落咗場及時雨，大家都話好神奇。
卓妮