工廈無牌酒樓 食署懶取締

食物環境衞生署負責檢控無牌食肆,為市民健康把關,惜空有權力卻執法不嚴。觀塘有酒樓無牌經營逾半年,食環署僅提檢控及罰款,卻一直未作取締。在食環署「懶懶閒」執法下,違規酒樓依然每日「打開門口」大做生意。立法會議員狠批食環署執法寬鬆,令市民健康毫無保障。

家居觀塘工業區附近的楊伯為退休人士,平日愛到成業街一設於工廠大廈地下的酒家用膳,「幫襯咗成年,貪佢早茶時間唔多人,又平平哋,所以得閒就嚟幫襯!」不過,最近楊伯發現酒樓外的招牌突然被拆走,但酒樓卻如常營業,頓起疑心,「有咩理由做緊生意會無端端拆咗自己個招牌,唔通有景轟?」

記者實地了解時,發現下午二時許雖已過午膳繁忙時間,酒樓內仍人頭湧湧,侍應不斷在廚房內取出大量即蒸食物,但收銀處卻未有展示食環署發出的牌照,食客鮮有留意。

食環署發言人證實上述酒樓屬無牌經營,並指該酒樓曾由不同人士經營,今年五月曾申請工廠食堂牌照但不獲接納。今年一月至七月,該署已向有關無牌酒樓提出五宗檢控,其中一宗已完成審理,負責人被罰款九千元,而其他四宗仍排期審理中。食環署將繼續留意上址情況,並會採取適當執法行動,包括考慮封閉有關酒樓。《食物業規例》規定,任何人無牌經營食物業處所,即屬違法,最高可被罰款五萬元及監禁六個月,另加每日罰款九百元。

議員促撒手鐧封舖

記者其後發現,有關酒樓已封閉成業街出入口並拆去招牌,改在工廈內另闢出入口,食客則可如常光顧。

「食環署明知道間酒樓申請唔到個牌,就應該向法庭申請封舖,法庭點判冇人知,但食環署冇提出就係佢唔啱!」立法會食物安全及環境衞生委員會委員王國興批評食環署執法不嚴,令無牌食肆將罰款只當作成本經營,難起阻嚇作用,反而應以「撒手鐧」申請封舖,以保障市民健康及安全,「雖然唔知酒樓點解攞唔到牌,但萬一係食物唔乾淨或者走火通道有問題,出咗事邊個負責?」

法律界人士黃國桐指,單靠票控難以有效杜絕無牌經營者,「淨係票控根本冇用,只係畀法庭每次倍增佢嘅罰款,間食肆一樣繼續營業!」黃認為食環署應針對食肆不獲發牌的原因,再聯同相關部門進行聯合行動,「食環署知道問題係咩,可以再搵消防處、渠務署,甚至水務署一齊封佢舖,佢仲有得做?」

記者 梁少儀

Money18免費即秒股票報價網站現推出8升級功能,財經資訊,實時實發!