本報「政情」版挖出煲呔曾一件陳年往事：話說○九年豬流感肆虐，據聞身為食物及衞生局常秘嘅李淑儀，提議應設立一個隔離區，以免重蹈當年沙士疫症迅速喺社區擴散嘅覆轍，以保障全港七百多萬市民健康。
李常秘嘅建議合情合理，但煲呔曾死要面子，擔心一旦設立隔離區，恐影響形象又會打擊旅遊業，李常秘着眼市民健康為大前提，據理力爭，煲呔曾唔夠人講，即時面黑並用英文拋出一句：「你知唔知依家同緊邊個講嘢呀！」嘩！北大人話佢唔識做波士，我就唔多信，你睇佢幾識「端款」，只欠叼支大雪茄啫。
成日都聽啲人話煲呔曾剛愎自用，若然老朽唔信呢單陳年往事係真，豈不重蹈煲呔曾剛愎自用之覆轍。煲呔曾話明唔鍾意讀歷史，是以未能以史為鑑，如今夕陽政府已進入倒數階段，識唔識做波士，對煲呔曾來講已意義不大，反正吹水治港咁多年，市民都麻木了。之不過，佢應感到「人未走，茶已涼」，否則「關愛基金」由佢牽頭都爛尾，以香港富豪之多，籌區區五十億算乜嘢。
一個冇容人之量、又冇識人之智及用人之術的長官，單打獨鬥，叻嘅都死。煲呔曾一句：「你知唔知依家同緊邊個講嘢呀！」老朽不禁想到有些人頭上雖沒辮子，更沒有穿龍袍，而是西裝禮服煌煌然，繫最時尚嘅煲呔或領帶，口中唸唸有詞「以民為本」、「做好公僕」，然而，他們的思想胸襟、言行舉止，所追求的卻很像皇帝，至少也是「土皇帝」。做皇帝梗好過做波士，信不信由你。