政情：老鼠曾生 橫行舊政府總部

政府總部，鼠輩橫行！煲呔曾尋日喺舊政府總部新翼會議廳，就施政報告諮詢策發會意見。一眾策發會成員進入新翼無耐，一隻足足有手掌咁大嘅老鼠，喺總部中座同新翼中間嘅花槽出現，並不斷嘗試走近新翼門口。不過，因大批傳媒企咗喺門口位置，鼠輩多次走出嚟之後，見到人又驚得滯走番轉頭匿埋，令人諗起最近為咗避見傳媒而走後門嘅煲呔曾。

期間有記者嘗試撩呢隻特區鼠輩出嚟，但叫極都冇反應，直至有人稱呼佢做「曾生」，隻老鼠竟然立即現身，莫非呢隻鼠輩真係姓曾？真係好耐人尋味！

講開姓曾嘅鼠輩，本報喺今個月頭向特首辦查詢煲呔曾任內嘅放假紀錄，包括每年放咗幾多日假、幾時放假、有冇儲埋大堆假期唔放等，點知等咗大半個月到尋日先有回覆，但答案「完全係垃圾」，淨係講到煲呔曾每年有廿二日假同最多可以儲到廿二日假，完全冇答到我哋想知嘅問題。連放假情況都咁鬼祟，當係國家機密咁處理，呢個政府真係冇得救！

「Money18免費即秒股票報價網站」現推出8升級功能，財經資訊，實時實發！