政情：何鴻光爭做醫學界選委
特首選舉委員會將於年底舉行，醫學界選委議席將由廿席加到卅席，令戰況更激烈，除咗骨科名醫高永文組成七人名單參選外，香港醫學會亦計劃提名卅人名單競逐，希望有一半人當選。據聞暫時答應代表醫學會參選嘅醫生有唔少猛人，包括中信泰富前主席榮智健嘅姪女婿、心臟科名醫何鴻光，有兒歌醫生之稱嘅醫學會副會長陳以誠及眼科醫生周伯展。
雖然未知能否當選做選委，但醫學會最近已開始約見三名疑似特首候選人，會長蔡堅話，會請佢哋講吓政綱，仲要睇吓佢哋係鷹派定鴿派，會否支持惡法同維護新聞採訪自由。最近社會對替補機制有好多聲音，醫學會十月五日會聯同十個專業團體，包括兩個律師組織見政制及內地事務局局長林瑞麟。
蔡堅話，補選係市民權利，唔應該取消，但佢希望多啲醫生發表意見，收集意見後刊登喺醫學會會刊，再了解吓會員嘅睇法，然後向代表醫學界嘅立法會議員梁家騮反映，等佢決定點投票喎。