政情：姚冠東「 出山」誓拉二人下台
「我哋班校友，唔會就咁放過徐立之同曾偉雄！」九八年港大畢業嘅姚冠東，係上星期港大八一八集會搞手之一，自言畢業後十幾年，從未試過行得咁前，今次「出山」全因被校長徐立之同警務處處長曾偉雄激到過咗臨界點，忍無可忍下先聯同一班校友搞集會、搞聯署，矢言唔會咁快收手，誓要兩人下台辭職先至收貨。
九六年做港大學社聯會會長嘅阿東，一提起徐立之，就青筋都現埋，佢話校長只識周圍籌款搵銀，對保衞港大校譽就完全失敗，根本係自毀百年校格。佢話校長喺集會上罰企三個鐘，唔代表校友就收貨。佢要求徐立之下台辭職，否則就代表港大公開譴責警方，為同學取回公道。
警察入校園 如引清兵入關
阿東記得九七年回歸前嘅「國殤之柱」事件，佢都有份搞，佢話當年港大校長鄭耀宗幾龜縮都好，都只係叫保安攔住架貨車，從來唔敢叫警察進入港大校園，「幾百個差佬，都只係外圍觀察」，但今次徐立之畀警察踏入港大校園，阿東話同「引清兵入關、中門大開無分別」。
阿東仲拍枱大罵曾偉雄：「呢條友上任後，所有賤招都做盡。」連港人基本嘅言論自由同人身自由都摧毀晒，而且毫無悔意，應該立即下台。佢話，如果煲呔曾有少少政治智慧，都要即刻「怒斬」曾偉雄。
當講到所謂「核心保安區」時，阿東火都嚟埋，話港大每一個地方都可以係示威區，所謂嘅保安區，根本係要消滅所有示威聲音。「佢有危險，你咪用兩排G4（保護要人組）拉起人牆保護佢囉，點解要隔離三百米？邊有人掟嘢掟到三百米？奧運選手都掟唔到啦。」