中環耳目：趙振國帶山東幫歎日本菜
有「假髮大王」稱號嘅香港美容美髮商會前會長趙振國（CK），識食識歎，食日本菜首選灣仔駱克道嘅「友和日本料理」。日前一個晚飯時間，卓妮見佢喺度現身，同枱仲有五位青春無敵嘅年輕男女，原來係「香港山東青年會」主席丁華等骨幹分子，特登嚟同山東幫前輩請益。
本港現有近六十萬名山東人，勢力龐大，好似老工業家蔣震、CK都係山東漢子。近年愈來愈多山東學生來港留學，「香港山東青年會」遂應運而生，個會啱啱成立已有近四百名會員，大家都一腔熱誠想融入香港。當晚香港山東商會副會長梁紹莊都在場，大家一邊歎美食，一邊互訴鄉情，零舍開心。
曾經留學日本嘅CK極鍾意食日本菜，而且為求美食，不問代價。當晚佢點菜完全交由友和老闆林祥友發辦。佢話，外行人至會睇餐牌落柯打，而老闆先知當日有乜靚嘢食。當晚最矜貴嘅係吞拿魚面珠肉，友哥一早就拎成塊魚肉到CK面前，然後入廚炮製成極品火炙壽司，入口即融嘅口感，令人一試難忘。