中環出更：陳振聰「西苑」食飯為外母賀壽
官司纏身嘅商人陳振聰，依然無損心情，尋日陪老婆同屋企人一齊出街食晚飯，尋日啱啱係踏入農曆八月，莫非咁早就為中秋節做節？原來係慶祝外母生日。卓妮尋晚七點幾鐘路過銅鑼灣一帶，就見陳振聰同老婆譚妙清及屋企人，一行八至十人齊齊到利園二期嘅「西苑」食晚飯，佢哋坐喺貴賓廳，張大枱貼近落地大玻璃，街外途人只要抬頭一望就睇清楚晒佢哋嘅背面。
陳振聰尋日身穿深色西裝同淺藍色間條恤衫，陳太打扮就比較簡單，頭紮馬尾着件黑灰色間條長身T恤，再配黑長褲同涼鞋，佢哋一到就入咗玻璃貴賓房，席間見陳振聰有講有笑，仲露出招牌嘅哨牙笑容，更不時望出街外睇街景。卓妮從外邊望上去，見窗枱放咗部專業型嘅單鏡反光相機，原來係陳振聰嘅私伙相機，事關見佢拿起幫家人影相。
「西苑」經理話，陳振聰係佢哋嘅熟客，仲透露席間有位由廣州來港做戲嘅大老倌添！食到夜晚九點鐘左右，陳太率先送親友離開，然後再折返酒家入面繼續陪老公撐枱腳，直到十時四十五分埋單離開。睇嚟陳氏一家未有為官司而煩惱，仲可以繼續逍遙咁享受生活喎！