中環出更：秘魯尋根 莫華倫登山全家氣促
世界著名男高音莫華倫（Warren）經常忙於巡迴世界各地演出，於是趁暑假遠離煩囂，同家人暢遊南美秘魯，訪尋世外桃源。原來Warren同當地淵源深，事關佢外公係秘魯華僑。今次尋根之旅令莫家嘆為觀止，可惜期間遇上高山症反應，美景當前，Warren連唱歌都無心情，惟有搏命深呼吸保命。
卓妮早前喺一個慈善活動上遇見莫太邱文伶（Winnie），佢好風騷話啱啱同老公去旅行充電，先到加拿大會合喺當地讀暑期班嘅囝囝Leighton，然後起程玩轉中美洲及南美洲。
影相個個變「紫面人」
旅程以秘魯之行最刺激，Warren同家人登上新世界七大奇迹嘅馬丘比丘（Machu Picchu），古城由印加帝國所建，位於海拔二千多米以上山嶺，風光神秘，如入仙境，因而有「天空之城」美譽。踏上高山，不適反應愈來愈厲害，Winnie頭痛兼發燒，更徹夜難眠。Winnie笑言因為血液含氧量低，膚色變得紫黑，影完相一睇，全家變咗「紫面人」。
Warren又帶隊歎美食，走進餐廳內，店員熱情地推介一款「上等肉」，全家吃得好滋味。食完後好奇地追問店員係乜東東，原來「上等肉」係秘魯最著名嘅「炸天竺鼠」和「駝肉」，認真嚇一跳。
絨毛光亮、像羊又像駱駝的駝羊，係秘魯國寶，尤其係駝羊毛質細緻輕柔，Winnie都忍唔住手狂掃多條駝羊披肩。問到價錢，佢甜笑話：「唔好講錢喇，總之每條由一千美金至七千美金（約七千八百港元至五萬四千六百港元）不等。」難怪駝羊被稱為「安第斯山脈上走動的黃金」。
卓妮