政情：歐耀佳扯火激過80後
香港大學百周年慶典搞到一鑊泡，全城校友齊心聲討校方同警方，咪以為淨係八十後校友先夠大聲夠激進，今次連唔少老校友都走出嚟發聲。當中一九八三年醫學院畢業嘅聖母醫院副行政總監歐耀佳，前晚參加完港大集會之後，再遊行落西區警署示威遞信嗰陣，就當面鬧爆差佬，激過唔少八十後。
歐耀佳喺晚會後跟班學生行落西區警署，一出校門口就因遊行路線問題同警察口角，見到有警方近距離拍攝遊行情況，佢更加扯火，指住警員大鬧：「你做咩影我，你依家侵犯我私隱！」又叫個督察交出警員編號，要作出投訴。
唔少學生見到歐耀佳咁好火，即刻走埋去幫口鬧埋一份，搞到群情洶湧。