尋日先至講過，百年老字號嘅廣華醫院已經爛溶溶，政府居然遲遲都未落實重建計劃，證明官僚作風係幾咁效率低劣。今日要同大家講一個古仔，表面上係小事一宗，其實背後暗藏一個大危機。
呢一個古仔係咁嘅，石塘咀保德街一幢大廈後巷，有一個棄置多年嘅巨型工字鐵，已經嚴重銹蝕，危及途人安全。棄置咗幾耐呢？巴閉咯，超過二十年。其實早於九五年已經有人向屋宇署投訴，要求清拆巨型工字鐵，可惜左搞右搞之後不了了之。到咗舊年，大廈業主立案法團去信政府部門要求清拆。
清拆爛鐵啫，本來好小事，可惜官僚作風硬係鍾意拖拖拉拉互相交波。屋宇署話喎，工字鐵位於政府土地範圍之內，應該交由地政總署處理。之但係地政總署又賴帳，佢哋認為部分工字鐵位於私人地段之內，要求業主先拆咗屬於大廈部分嘅工字鐵，署方先至會跟進。
講到呢度，功夫茶諗起名著《厚黑學》裏面提到嘅「鋸箭法」。有人中箭受傷，當然係走去睇醫生啦，醫生將露出體外嘅箭尾鋸斷，馬上開單向傷者收錢。傷者就話嘞，醫生呀醫生，你都未處理我體內嘅箭頭，收乜嘢錢呀？醫生就話嘞，我係外科醫生，只負責體外問題，體內箭頭屬於內科範圍，你必須另外幫襯內科醫生，畀錢啦老友！
所以話啫，但凡做官嘅一個二個都係厚黑門徒。屋宇署話唔關佢事，地政總署又話唔關佢事，即使真係關佢事，鋸完箭尾就算鬼數，話之你箭頭遺留體內危害安全。
冇錯，工字鐵事件確係小事一宗，問題係呢個只不過係冰山一角。如果你問，回歸以來點解香港一事無成呀？搞乜鬼十大基建同六大產業始終似有還無呀？答案就係，官場中人拖拖拉拉互相交波，冇人願意認認真真踏實做事。
特區政府該做而未做嘅工作多不勝數，醫院人手荒至今未解決，缺乏骨灰龕至今未解決，清拆僭建物至今未解決。呢嗱嗱嗱，外傭居港權風波點解搞到咁大劑呀？咪又係一眾大官小吏得過且過，遲遲冇想辦法解決囉！
正所謂，一葉足以知秋，棄置廿年未清拆嘅巨型工字鐵同樣可以反映一幅大圖畫，畫裏面百廢待舉恨綿綿，唔知幾時先至有機會享用安樂茶飯。
功夫茶記得曾蔭權當年參選特首嘅時候誇下海口，講得出一定做得到。可惜吖，時間證明一切都係廢話，得把口講之嘛，做唔做係另一回事。如果有人認為煲呔曾係一碌嚴重銹蝕嘅人形工字鐵，功夫茶一定會話，要拆趁早，愈早愈好！