一直係疑似下任律政司司長嘅資深大律師翟紹唐尋日語出驚人，自爆話唔定明年做特首喎。
翟紹唐以最低工資委員會主席身份出嚟見傳媒，講下最低工資實施咗差唔多四個月嘅情況。一向被指大膽敢言嘅翟紹唐已經唔經唔覺進身為新公職王，之前佢接受傳媒訪問時，就批評政府將飯鐘同休息日計錢交畀勞資協商係不切實際，引起各界嘩然，點知佢尋日又語出驚人話自己可能做特首。
翟紹唐尋日話，委員會最遲會喺明年十一月交檢討報告畀特首，但夕陽政府明年年中就換屆，一直傳係律政司司長大熱人選嘅佢，尋日就畀記者問到，委員會交報告嘅時候佢仲喺唔喺度呢？佢即刻話如果無畀人炒魷魚嘅話，佢諗佢仲應該係呢個委員會嘅主席。跟住再問佢到時會唔會已經有其他身份，佢好得戚咁話唔知呢，仲話有啲委員話佢或者做咗特首添。莫非翟紹唐唔單只想做律政司司長，仲想跳入特首選舉中競跑？