政情：立會秘書處變吸味先鋒
立法會行政管理委員會下周三開會決定係咪如期搬往添馬艦新立法會大樓辦公，但據聞有少數秘書處職員，喺近日已陸續搬屋。有議員助理就投訴新大樓仲有大陣裝修味，有毒氣體含量隨時超標，危害喺裏面返工嘅職員同助理。有政黨就更加要求押後到最後先搬，以免做咗吸味同吸塵先鋒。
秘書處聘請嘅搬屋公司近日通知各黨派，佢哋現時位於舊政府總部西座同花旗銀行大廈嘅中區議員辦事處，將於下月十九日至三十日搬往新大樓，每個工作天搬六個議辦，兩周合共十個工作天就可以搬晒全體六十名議員，如果遇到打風落雨，就喺周六日再加班搬屋。
有議員為咗盡早執好嘢展開工作，自願提早搬屋，但擁有最多議員嘅民建聯就怕咗新大樓陣裝修味，特別要求最後先搬。有助理更計劃班番部測試有毒氣體嘅儀器，驗吓新大樓嘅室內空氣有冇超標，藉此拖延搬屋。不過其實最慘嘅係班秘書處職員，大部分喺九月上旬就要搬去新大樓吸味同食塵。