警方喺國家領導人訪港期間緊張過龍，嚴厲嘅保安安排搞出大頭佛，喺內地訪問嘅保安局局長李少光尋日被問到警方係唔係非法禁錮學生時，就推卸話自己一直唔喺香港，單睇報道就評論事件係唔公平喎。
雖然局長話乜都唔知所以乜都答唔到，不過佢對香港傳媒有咩報道又好清楚喎。佢尋日不點名批評《壹週刊》報道，話內容完全荒謬，仲引用埋政務司司長唐英年嘅垃圾論，話《壹週刊》報道內容係「totally rubbish」喎。佢仲話，有本地傳媒將成件事「抹紅」，保安工作並無假手內地咁話。
《壹週刊》內容不時被人否認，問題係李少光要同唐唐開玩笑都引述錯，唐英年講嘅係「completely rubbish」而唔係「totally rubbish」。不過資深英文老師周蘿茜話，佢兩個人所講嘅，文法上都錯，因為唔可以用一個副詞去形容名詞，正確嘅用法，應該係「It’s all rubbish」。總之就係一堆垃圾喇。