政情：教局洗腦教育傳跪低
夕陽政府無能，煲呔曾領導無方，幾有經驗同能力嘅人入到去一樣係死路一條。○七年煲呔曾搵咗為官多年嘅孫明揚做教育局局長，目的就係執番正喺教院風波中搞到軍心散渙、聲名狼藉嘅教育部門。頭幾年都好地地嘅，點知踏入近兩年教育局施政處處碰壁，教科書價格搞唔掂，尋日更傳出夕陽政府諂媚之作——德育及國民教育科都要收皮，真係邪到唔信。
政府早幾個月公布，建議所有中、小學都要推行德育及國民教育科，小學明年九月實施、中學就一三年九月先會開始向學生教授呢一科。自從政府公布會推行國民教育科後，坊間掀起一陣熱烈討論，愛國愛港團體當然拍手歡迎啦，只不過大部分團體就質疑呢一科只係洗腦教育，學生上完堂就只識愛國，唔識獨立思考。
更弊嘅係，大部分教育團體同樣唔支持開辦呢一科，無他嘅，全因推行太過倉卒，又冇考慮到學校同教師工作量，仲有夠唔夠專業人才教又講唔到、小學係唔係需要呈分又未交代，咁點會得人支持呀？不過無計喎，垃圾煲呔曾要趕住喺落台之前交功課，結果咪搞出教育局又煩、學界又煩、市民又煩呢個「三煩局面」囉！
或放棄中學推行
尋日有消息傳出，夕陽政府已經放棄喺中學推行國民教育科，不過小學就會如期喺下年九月推行。雖然各方面尋日都唔肯證實呢個消息，不過以夕陽政府近年一再跪低嘅習慣，即使係真都唔出奇。德育及國民教育專責委員會主席李焯芬話，諮詢期今個月底先完，唔會咁快有定案，佢哋都要下月十五日開會後先有結論，不過證實尋日個消息係芸芸意見中其中一個。
津貼小學議會主席張勇邦尋日聽到呢個消息後亦即時打電話畀教育局副局長陳維安，對方答佢話未有定案，雖然係咁，佢自己亦認為，要小學明年九月就教授呢科認真唔妥，佢個人觀察教育局內就呢個政策都冇共識，好似之前話研究取消部分小六生嘅公開試，呢樣都未傾完又話加多科出嚟，都唔知想點。如果夾硬推行，孫公必碰壁無疑，睇勻四周風頭火勢，都係投降算喇。