中環出更：90後女生 拜尹飛燕為師
後生仔多數都鍾意去「K房」唱流行曲，但係十七歲嘅拔萃女書院中六生梁心怡就偏偏鍾意跨越時空做古人、唱粵曲，尋日仲拜粵劇名伶尹飛燕為師，誓要完成學業之後進軍粵劇界。燕姐大讚新徒弟年紀輕輕就對粵劇充滿熱誠，又勤力肯學，個個都話佢係第二個尹飛燕咁話。
汪明荃：好似嫁女咁開心
心怡細細個就跟媽媽去睇粵劇，嗰時淨係覺得啲戲服同頭飾閃令令好靚，好鍾意睇咁話。後來大個啲先知粵曲當中包含好多詩詞歌賦，鍾意文學嘅佢就深深被吸引，兩年前仲加入八和粵劇學院嘅青少年班正式學藝添。所以身為八和主席嘅汪明荃就話，心怡拜師好似八和嫁女咁開心，仲可以將粵劇師徒制文化承傳落去添。
讀書成績優異嘅心怡話，平時讀書辛苦嘅時候都鍾意返八和練習，佢啲同學仔都會跟埋嚟，仲試過同學校中樂團嘅同學仔一齊表演添。
心怡話諗住入大學讀完法律就會投身粵劇界，屋企人都好支持佢。問佢怕唔怕搵食艱難？樂天嘅心怡冇有怕咁話︰「做戲都可以賺到錢㗎！」
卓妮