南北生態響警號，金翅大鑊鳥！
嗱嗱嗱，唔係功夫茶杞人憂天，真係好鬼死大鑊o架。北面咯喎，大連化工廠懷疑洩漏劇毒物質，激到當地幾萬怒民上街示威。南面咯喎，雲南省曲靖市陸良縣有人非法傾倒工業廢料鉻渣，嚴重威脅土地同水源。你知啦，大連海產享負盛名，萬一大海受到污染，莫講話內地同胞危危乎，香港人亦有機會受到連累。大連鮑魚就話未必食得起啫，你點知香港街市賣嘅扇貝或者海參唔係來自大連？
至於雲南，唔講大家可能未必知，原來雲南係香港蔬菜主要供應地之一，每年由雲南入口近六十萬噸蔬菜，包括西生菜、小棠菜、娃娃菜以及四季豆等等。雲南蔬菜會運去深圳、廣州同東莞等等批發市場，經入口商轉銷到港。如果再深入探討，大家又會發現，污染重災區嘅曲靖市陸良縣，亦係供港蔬菜重鎮，為不少菜商提供貨源。所以咯喎，業界非常關注，認為毒菜有可能已經殺入香港，要求食環署加強入口蔬菜檢測，保障巿民食用安全。
唉，問你死得唔死得？內地奸商不斷炮製黑心食品早已令人提心吊膽，家陣再有雲南毒菜隨時殺你一個措手不及，假如一不小心整你一鑊「雲南毒菜炒大連毒貝」，咁就名副其實一鑊熟！
講到尾，中國人都係犯賤o架嘞，劇毒工業廢料有乜可能隨隨便便就地傾倒？北京中央電視台仲揭發呀，今次禍害雲南搞出一個大頭佛嘅和平化工廠，喺南盤江邊露天堆積咗超過二十八萬噸鉻渣接近二十年，目前尚存十幾萬噸未處理，對南盤江下游嘅珠江流域埋下生化危機。喂，珠江沿岸有上億人口，如果水源生態受到破壞，後果真係諗起都打冷震。
既然南北毒禍齊來，香港人惟有千方百計自保啦。之但係有一個問題非常之咁頭痛，事關本地官老爺出晒名癡癡呆呆，面對食品危機往往反應遲鈍。漁農界立法會議員黃容根建議食環署加強食品監察，佢仲話：「其實業界一直有向政府反映，希望有關當局增撥資源，從源頭例如種子開始檢驗，加強對輸港食品嘅檢測，等市民可以放心進食。」你估食環署點樣回應今次危機吖嗱？署方發言人拒絕透露每年從雲南入口幾多蔬菜，只係話會向內地當局了解情況並且採取適當行動。講咗等於冇講，呢啲咪就係癡呆表現囉！
點都好啦，懇請食衞局局長周一嶽唔好再呆若木雞，勒令食環署嚴密把關，否則港人同胞毒死咗做鬼都唔放過你！