政情：郎朗分享音樂成功之路
國際知名鋼琴家郎朗早幾日出席「郎朗2011音樂人生分享會」，佢喺活動上同幾千名青少年對談，即席分享自己嘅音樂路，以及由細到大練琴嘅辛酸史。成功非僥倖，即使天才都要得到悉心培養先可以成才，郎朗透露，自己好細個開始練琴，當年每日早上五時四十五分就要起身練琴，認真辛苦。
郎朗同班青少年講，自己每日食晏都只係用十五分鐘，之後又會坐番埋個鋼琴度練習。雖然刻苦，不過佢堅持日日練習，結果終於蜚聲國際，總算係皇天不負有心人喇！不過，郎朗音樂路其實並非一帆風順，佢都有失敗過㗎。
郎朗憶述，自己五歲開始參加比賽，試過有次參加比賽只得第四名，獎品係一隻玩具狗，佢覺得係奇恥大辱，因為第一名可以得到一部全新鋼琴，故此佢一度考慮過整爛份禮物。不過諗深一層，呢份始終係禮物，於是自此將隻玩具狗放喺部鋼琴前激勵自己，努力下咪終於有今日嘅地位囉！