政情：郭羅桂珍怕失威捱貴租
香港舖租近年大幅飆升，搞到一眾零售業界牙痛咁聲。莎莎老闆娘郭羅桂珍亦不能幸免。最近郭太旗下喺銅鑼灣嘅一間分店，就畀業主大幅加租兩倍，由三十萬元加到九十萬元，認真嚇人，但為免喺競爭對手面前失去呢個橋頭堡，咬緊牙關都要續租落去。郭太依家就諗計變陣，考慮租商場舖位，好似軒尼詩道黃金廣場就開咗其中一間分店，總之做生意係唔會一成不變嘅。
講起暑假外遊，郭太就同家人去咗俄羅斯玩咗幾日，暢遊莫斯科及聖彼得堡等歷史名城，又買咗隻充滿民俗特色嘅黃金蛋做紀念品。俄國之旅完畢就飛去英國，因為郭太嘅囝囝打算負笈英倫，所以去倫敦睇吓樓，物色一個合適嘅居所。倫敦近日發生大暴亂，郭太會否擔心囝囝嘅安全呢？佢相信呢啲亂象唔會重演，況且今次暴亂亦可以成為佢同當地業主講價嘅理由喎。