政情：呂迪明落區有粉絲服侍
靚女做嘢幾時都着數啲，相信呢點冇乜人會質疑，好似近幾年活躍於梨木樹一帶嘅新界社團聯會理事呂迪明（Casta），除咗係聯會活動御用司儀外，近排喺地區工作更遇到癡心男粉絲，對方唔只成日癡癡咁望住佢，仲不時主動斟茶遞水，就連同Casta一齊工作嘅義工都受惠，咁你話靚女係唔係好着數先？
Casta本身係舞台劇演員，外表亮眼出晒名，佢平時落地區工作已經好受歡迎，為咗方便工作，佢好多時都不施脂粉，勢估唔到咁都吸引到一個忠實支持者。Casta話，有一次去上培訓課程，幾日冇落區，之後見番呢個男粉絲，對方即時好緊張上前噓寒問暖，又關心佢去咗邊度，其他義工就取笑Casta，話咁快就有人暗戀佢喎。
不過，Casta明年二月就會結婚，唔知佢嘅紛絲會唔會好失望呢？講番地區工作，Casta又想起有一次去鄉村探訪，點知人生路不熟，唔小心半個人跌咗落坑渠，幸好只係皮外傷，冇乜大礙，但事後就有鄉民將親手種植嘅水果送畀佢，佢笑言今次都算因禍得福喎。