政情：范太追打落水狗
國務院副總理李克強前日嚴厲訓示煲呔曾，話佢無切實做好工作，但唔知佢係咪資質低聽唔明，抑或扮懵當無嘢。煲呔曾同佢領導嘅夕陽政府時日無多，兩位疑似特首候選人見佢江河日下，都唔怕明刀明槍向佢開火。其中全國人大常委范徐麗泰更加話同煲呔曾唔係好熟，擺明要同佢劃清界線。
范太尋日出席國家「十二五」規劃與兩地經貿合作發展論壇時，被問到點睇李克強訓斥煲呔曾一事，佢就連消帶打話，李克強嘅言論唔算得上訓誡，因為總理溫家寶喺工作報告時都經常提及要「落到實處」，所以認為李克強嘅言論，某程度上可視為一種鼓勵或者係推動。既然講得係推動，多數係唔郁嘅大懶蛇先至要推嘅啫，莫非係想話煲呔曾係踢一踢、郁一郁嗰種人？
究竟煲呔曾明唔明李克強所講嘅嘢，范太就話佢自己並唔知道，叫記者問番煲呔曾喎。乜范太唔係同煲呔曾好熟嘅咩？范太隨即同煲呔曾劃清界線，話同煲呔曾唔係好熟，講到興起仲爆咗句：「我無咁榮幸，可以同曾蔭權熟」，直情畫公仔畫出腸，莫非范太聞到中央全方位不滿煲呔曾嘅焦味？
CY抽水寸手腳慢
另一疑似特首候選人CY前晚出席專業及資深行政人員協會講座時，亦乘機「抽水」寸爆煲呔曾。CY致詞時，佢用深圳大運會做例子，話人哋啲體育場館兩年就起貨，如果換轉係香港人，都唔知要搞幾耐先至起好喎，擺明寸爆煲呔曾領導嘅夕陽政府慢手慢腳。
CY仲話，當年回歸無諗過深圳會喺十四年內發展一日千里，但香港就停滯不前，又話依家形勢唔係「不進則退」，而係「慢進則退」，擔心香港遲早畀深圳過頭喎，暗寸煲呔曾多年來無做嘢，令香港得個吉。不過，有政治口痕友話CY唔好忘記自己都係政府一分子，咁樣反轉豬肚就唔係咁好啦！