中環出更：胡曉明遊南非擦巨型鮮鮑
日本鮑魚喺地震災難後幾近絕迹，取而代之，係南非鮑魚。專業及資深行政人員協會會長胡曉明（Herman）都專程去南非歎鮮鮑，每隻巨大如手掌，睇見都流口水。
Herman上月同太太及專資會成員暢遊東非及南非，大擦當地美食。南非鮑魚出名抵食夾大件，團友一人柯打一隻，齋食鮑魚都飽肚。
Herman話，南非鮮鮑肉質厚，入口彈牙，雖然唔係「溏心鮑」，但味道鮮甜無比，不遜乾鮑，每隻盛惠一百零五元美金，約八百二十港元，團友食到舔舔脷。除咗鮮鮑，Herman入住南非酒店期間，仲有生蠔當早餐，絕對係富豪級享受！
愛妻掃六黃蓮蓉
中秋就到，胡太見新鮮月餅已出爐，拿拿臨掃入一盒「六黃蓮蓉月」。六黃？無錯！胡太話，雙黃或四黃月餅已滿足唔到佢，六黃月餅，蛋黃夠集中，入口啖啖蛋黃香，暫時買住一盒試味先，嚟緊一定瘋狂掃貨喎。
卓妮