中環出更：名人買國債博升值抗通脹
要數當今世上最強貨幣，非人民幣莫屬。尋日財政部推出人民幣國債畀香港市民認購，雖然兩年期國債嘅年息只得一厘六，但係勝在可以博升值，唔少城中名人都話係抗通脹之選，仲話要參與認購添！
恒生銀行副董事長兼行政總裁梁高美懿話，今次領導人提到人民幣業務嘅篇幅好大，為金融界打咗劑強心針，對於提升香港國際金融中心地位亦好重要，事關人民幣離岸業務係香港獨門生意，大家更加要把握時機。
渣打銀行行政總裁洪丕正就話，早排人民幣國債接受機構投資者認購，勁受歡迎，依家零售部分啱啱開始，佢自己都會落場買，因為國債好安全、優質，係抗通脹嘅好方法。
新鴻基地產非執董郭炳湘都話，今次人民幣國債發行規模好大，人人都會有機會分配到，相信會好受大眾歡迎。雖然零售部分只設兩年期，票面利率一厘六，但郭大少話，加埋升值嘅潛力，回報一定會好好。
劉夢熊：好過揸美元
全國政協劉夢熊就攞股票做比較，認為國債夠穩陣，更勝大起大落嘅紅籌股。同時人民幣不斷升值，好過揸美元或同美元攬住一齊死嘅港紙添！講到人仔咁抵買，佢梗要入番幾手啦！
卓妮