既然香港有一位蒙面嬌娃紫荊俠，專門向貧苦老弱派錢派食物，功夫茶認為財爺曾俊華同樣有資格化身做一個漫畫英雄。之不過咁，由於曾俊華嘅所作所為比較特殊，佢嘅英雄身份係「傻瓜超人」。
未講傻瓜超人點樣拯救地球之前，必須先向各位介紹一幅大圖畫。美國出現債務危機，國際評級機構標準普爾調低美國信貸評級，由ＡＡＡ降至ＡＡ＋，引發全球恐慌，股市應聲急挫。世界銀行仲警告，全球市場面臨新嘅危險區域。
地球好危險吖嘛，咁就係傻瓜超人出動嘅時候。曾俊華搖身一變，一聲令下，全球派錢！
喂喂喂，咪住先，大家可能會話，鬍鬚曾傻係傻咗啲，之但係佢只不過話向所有香港同胞每人派發六千銀啫，冇話過全球派錢喎。如果大家咁諗就錯嘞，事關香港同胞嘅含意包括所有移居海外嘅「外國人」。學者計過數㗎喇，現時有七十九萬名香港永久性居民身在異鄉為異客，當中十八歲以上有資格攞錢嘅有六十七萬人，全數派錢涉及款項四十億元。你話嘞，動用四十億港幣向六十七萬位非本土人士派錢，派到全世界各國都有，仲唔係拯救地球？仲唔係超人義舉？雖然呢一種義舉比較特殊，不過你咪理，話唔定會為穩定國際市場出一分綿力。你知啦，移居美國嘅香港同胞一旦攞到六千銀，隨時能夠大吃大喝刺激美國經濟，總統奧巴馬實在有必要寫一封感謝信畀曾俊華。
當然啦，有識之士未必認同傻瓜超人救地球，因為四十億元與其派畀相對有米嘅外國人，不如用嚟接濟窮到褲穿窿嘅本土貧民。香港大學社會工作及社會行政學系教授葉兆輝就話嘞，如果將四十億元用於香港，足夠支付三十二萬名老人家一年嘅生果金。葉教授仲話，派錢措施明顯有人計錯數，最終令到資源錯配。
同葉教授諗法一致嘅應該包括紫荊俠，呢一位巾幗英雄講到明，正正係因為曾俊華胡亂派錢，富貴一族又派，移居海外又派，所以挺身而出撥亂反正，先由佢應得嘅六千元派起。
唉，講到呢度功夫茶不得不承認，鬍鬚曾嘅派錢方案確係十分戇居，開頭堅決唔派，後來急急轉軚，由始至終極之樣衰，之但係事到如今可以點呢？唔通忽然之間又話唔派畀虎視眈眈嘅海外華僑？咪玩啦，香港再次淪為國際笑話就唔好啦。所以為今之計係迫於無奈許一個願，傻瓜超人救地球功德圓滿，阿彌陀佛！