日前我哋寫過環境局局長邱騰華，揀正喺機電工程署公布取締鎢絲燈諮詢文件當日開始休假，懷疑佢係唔想再被挑起慳電膽現金券疑似益煲呔曾親家嘅醜事。尋日佢結束休假返工，咁啱又撞正擴大膠袋稅諮詢期完結，邱騰華借出席一項學生活動時，硬銷市民支持擴大膠袋稅。證明佢除咗識得夾啱時間放假避醜事，仲會夾啱時間復工做騷攞彩。
邱騰華避走香港四日之後，尋日出席一個學生環保體驗營，同中學生分享低碳生活貼士。不過，尋日咁啱得咁蹺，係第二階段擴大膠袋徵費諮詢期完結，加上邱騰華出名唔鍾意正正經經開記者會交代政策，因此吸引咗大批傳媒到場追問佢有關諮詢結果，喧賓奪主。究竟佢係真心想同班後生仔傾偈，抑或想借班後生仔過橋做騷攞彩，就只有佢自己先至知喇。
邱騰華聲稱至今收到過千份意見書，大部分認為第一階段膠袋徵費有成效，初步意見支持擴大徵費範圍喎，同一般市民、商戶及環保團體嘅睇法相距甚遠，好難令人信佢囉！