政情：何秀蘭遊綠島 「罪」證確鑿
各大政黨都忙於備戰十一月區議會選舉，正準備同其他泛民主派勞工代表籌組工黨嘅立法會議員何秀蘭（Cyd），因為毋須為區選操心，前排偷得浮生同朋友去台灣旅行一星期。不過，佢去嘅地方唔係熱門旅遊勝地，而係台灣嘅綠島，佢仲專登同代表「思想不正」嘅展品合照。
阿Cyd上周日啟程去台灣，雖然今次都有去熱門旅遊地點嘅台北，但旅程主要係去綠島，事關佢想去前身係綠島監獄嘅人權紀念館。阿Cyd話，嗰度有唔少展品道出台灣侵犯人權嘅歷史，所以吸引佢去嗰度回顧一下。就喺嗰度，佢同一幅寫滿各種罪名，例如思想不正、借閱具有煽動性詩集等字句嘅展品影咗張相。
大家睇到張相都未必認得出相中人就係阿Cyd，原來佢去台灣嗰幾日，陽光普照，綠島又唔多樹木，所以阿Cyd曬到成個人黑晒，加上佢又戴咗副黑超，所以咪較難認得出佢囉。佢建議大家有興趣去綠島嘅話，揀秋天時間比較涼爽啲。