政情：鄭文雅為攝影展捱到病
前港姐鄭文雅（Olivia）興趣廣泛，打高爾夫球、玩相機都係佢嘅強項。尋日佢喺旺角朗豪坊舉行個人第二次攝影展，今次主題係戲曲。Olivia話，希望下一次可以為啱啱大病初愈嘅八十四歲媽咪影番輯靚相。
尋日下午攝影展開幕，好多老友現身撐場，包括名媛張天愛。Olivia為咗呢個展覽已經忙足一個月，佢事事都親力親為，連擺設都係自己設計。開幕前一晚，唔少好朋友齊齊通宵幫手，佢自己都捱到病咗，認真辛苦。不過，見到咁多人欣賞佢嘅大作，乜都抵番啦！
Olivia定居喺英國嘅媽媽因肺炎入院，情況好嚴重，但佢忙於籌備攝影展，一直抽唔到身去探病，好彩媽媽吉人天相，依家好番出咗院，等佢忙完攝影展後，就會飛去英國探媽媽。佢又話自己一直想幫媽媽影輯相，事關佢好鍾意影老人家，覺得佢哋嘅皺紋充滿滄桑美。