政情：郭炳湘撐婦協新總部
新鴻基地產非執董郭炳湘尋日現身灣仔鵝頸橋底，視察位於駱克道至告士打道一段橋底嘅「香港婦協郭得勝服務中心」。中心係婦協嘅新總部，嚟緊星期五就會隆重開幕，向婦協捐贈一千三百萬元建新總部嘅郭氏家族，梗要先睹為快啦。
郭炳湘約下午四時就到達，同婦協主席林貝聿嘉傾談開幕當日嘅安排，然後參觀中心新簇簇嘅設施，閱讀室、電腦室及會議室應有盡有，睇到郭家大少好開心。問佢點解咁支持婦協，原來佢係支持林貝聿嘉至真，事關新地總部喺灣仔三十幾年，而林太就做過灣仔區議會主席，依家兩人同時係全國政協，所以分外老友。兩年前林太同佢提起捐錢件事，大少一口就應承。
郭大少又爆料話，初時佢建議用媽媽新地主席鄺肖卿個名為中心命名，但係媽媽話唔好，兩母子商量之後，先至決定用爸爸郭得勝命名。為善最樂，郭大少為咗做更多善事，一年前成立咗「郭炳湘慈善基金」，至今已經幫咗唔少機構，包括由陽明山莊已故創辦人黃週旋新抱黃林碧瑢創辦嘅foodlink基金，都獲捐贈兩部車。