政情：大坑選戰
雞打定輸數
人民力量一直冇參與泛民嘅協調機制，佢哋講到明會喺十一月區議會選舉全面狙擊力撐二○一二年政改方案嘅民主黨（白鴿黨）。最近白鴿黨副主席單仲偕（雞）決定出戰灣仔大坑選區，挑戰當區區議員、新民黨主席葉劉淑儀嘅親信黃楚峰，但人民力量知悉後即派出主席劉嘉鴻（劉嗡）落場狙擊，實行同雞一拍兩散，勢要白鴿黨票債票償，三人大混戰局面一觸即發。
大坑選區向來係泛民主派地盤，○七年區議會選舉，黃楚峰都係僅僅以一百票險勝白鴿黨前議員李慶偉，所以有白鴿中人認為，雞憑多年從政名氣，就算少做地區工作都值得參選博一博。據聞雞幾個月前已開始落大坑選區派單張，而且聯同白鴿黨港島區支部主席李建賢等人，組成白鴿黨「灣仔幫」，希望利用黨嘅名氣帶動選情。
黃楚峰或坐收漁人之利
不過，雞勢估唔到「黃雀在後」，人民力量已將槍頭瞄準佢，劉嗡早前亦開始到大坑派宣傳單張，擺明向雞宣戰，就算贏唔到議席，都要雞落選，睇嚟雞今次復出，存在好大隱憂。
有熟悉當區嘅人分析，話人民力量屬激進政黨，就算加入混戰都只會搶到白鴿黨票源，對建制派嘅新民黨可以話係絲毫無損。再加上區議會選舉根本係泥漿摔角，大家嘅票數唔會差太遠，通常都係贏得幾百票，如果劉嗡能夠吸走雞一百幾十票，泛民打泛民之下，對黃楚峰絕對百利而無一害，分分鐘可以好舒服咁翹埋雙手，就連任做多四年。
不過，亦有白鴿黨中人話，雞今次復出唔係志在區選，反而係染指下年嘅立法會港島區直選，今次參選一來只係當熱身，二來明年選立法會時，就唔怕畀人話佢冇做地區工作。所以雞嘅如意算盤，係先成立「灣仔幫」，就算年尾區選輸咗，呢隊親兵都可以留番明年立法會選舉作樁腳之用。估唔到大坑選區未開戰已經火藥味甚濃，相信會成為今年選區焦點之一。